Imibereho yihariye ya Minisitiri w’Ubuzima Dr. Agnes Binagwaho

Minisitiri w’Ubuzima, Dr Agnes Binagwaho (Ifoto/Ngendahimana S)

Minisitiri w’Ubuzima, Dr Agnes Binagwaho (Ifoto/Ngendahimana S)

Dr. Agnes Binagwaho, yavukiye mu Rwanda mu cyahoze ari Perefegitura yaGikongoro (ubu ni Nyamagabe) ariko akurira i Burayi, yigayo ndetse arahatura.

Utamuzi; ushobora kumwibeshyaho wibwira ko ari umugore ukarishye ndetse ukibwira ko mu gufata ibyemezo atanagira imbabazi; ariko Minisitiri w’ubuzima arangwa no kugira urwenya ruherekejwe no guseka neza.

Ni umwana wa Jeanne D’Arc Kabagema na Dr. Didace Binagwaho, ubu batuye i Rwamagana.
Dr. Agnes Binagwaho afite abana babiri b’abakobwa n’umwuzukuru. Umurebye byakugora kwemera ko afite imyaka 61 y’amavuko kubera itoto afite mu maso.
Avuga ko ibanga rye ari ukuryoherwa n’ubuzima kandi agakunda ibyo akora.

Umunyamakuru wacu Fred Muvunyi yagiranye ikiganiro cy’iminota 30 na Dr. Binagwaho mu biro bye, ku Kicukiro. Ibi ni bimwe mu by’ingenzi baganiriye.

Umunyamakuru: Twibwire muri make

Jye ndi Umugore wahisemo gukora umwuga w’ubuvuzi, ndi Umuganga w’abana kandi ni bwo buzima bwanjye kandi uko ni ko ninjiye buhoro buhoro kugeza muri uyu mwanya ndimo.

Umunyamakuru: Winjiye mu buvuzi ryari?

Oooooh kera cyane, njyewe ndi mukuru mfite umwuzukuru, nagarutse mu Rwanda mu mwaka wa 1996 kandi nari umuganga wita ku ndwara z’abana (paediatrician).

Umunyamakuru: Kuki wahisemo kuba umuganga?

Nahisemo kuba umuganga, well birashoboka ko byatewe n’uko na papa ari umuganga ariko nagize icyo cyifuzo kuva nkiri muto.

Umunyamakuru: Birumvikana ko wubatse…?

Oya…ndi divorced (natandukanye n’uwo twashakanye)
Umunyamakuru: Ufite imyaka ingahe?

Ibyo ni ngombwa se? Njye nize ko imyaka y’umuntu ijyana n’imyifatire ye; kuko ushobora kugira imyaka 20 ukaba urashaje, undi akagira imyaka 80 kandi akaba ari muto, ariko mfite imyaka 61 y’amavuko.

Umunyamakuru: Eeeh…ko uboneka ko ukiri muto cyane, ni irihe banga ukoresha?

Yego ni byo nakubwiraga, ibanga ni ugukora cyane kandi ukishimira ubuzima, ukishimira ibyo ukora kandi iyo wishimira ibyo ukora kandi ukagira umwete, bivuga ko wishimira buri gice cyose cy’ubuzima bwawe!

Umunyamakuru: nta muntu ushobora kwemera ko ufite iyi myaka (urwenya…)

Ubwo rero ntubyandike kuko abantu bashobora kwibwira ko ndi umubeshyi (araseka…)

Imwe mu mirimo yakoze
2002–2008: Umunyamabanga Nshingwabikorwa wa CNLS
10/2008- 05/2011: Umunyamabanga Uhoraho muri Minisante
2011- Kugeza Ubu: Minisitiri w’Ubuzima

Dr. Agnes Binagwaho yaranzwe no kugira imyanya ikomeye mu nzego z’ubuzima mu Rwanda ndetse n’imiryango mpuzamahanga irimo za Kaminuza.

Afite Impamyabumenyi y’Ikirenga (PhD) aherutse guhabwa na Kaminuza y’u Rwanda. Amashuri yisumbuye na Kaminuza yayigiye mu Bubiligi

Umunyamakuru: Ubu rero uri umunyapolitiki?

Oya… ahubwo ninjiye mu muryango wari ukeneye ubumenyi bwanjye (my skills) kugira ngo ubuzima bw’Abanyarwanda burusheho kuba bwiza, kuba umunyapolitiki mu Rwanda ntabwo ari amahitamo, ufite ubumenyi bukenewe hanyuma ugasabwa gukora muri uwo mwanya, ntabwo nkora politiki rwose, ahari ntabwo ubyumva neza; mu Rwanda hari abo twita ABAFATA IBYEMEZO (Decision makers) kandi abantu barafatanya muri iyo mikorere, rimwe Igihugu kikaba gikeneye abantu bakora kugira ngo ikintu runaka kigerweho; nguko uko nanjye natoranijwe kugira ngo ntange umusanzu wanjye. Si uko ndi Umunyapolitiki ahubwo natoranyijwe kugira ngo nkore ibikorwa runaka.

Umunyamakuru: Nigeze ngira amahirwe yo kuba mu nama nawe wari watumiwemo, nabonye uburyo ushobora kuba ukarishye cyane, ni inama yari yatumiwe n’uwahoze ari Ministre w’intebe (Dr. Pierre Damien Habumuremyi ), iyi nama yavugaga ku mitangire ya Serivisi mu mahoteli ariko nabonye uburyo utangamo ibitekerezo, ndibwira nti; “Uyu muntu arakarishye”, Madame Ministre mbwira imyifatire yawe mu kazi.

“Ariko se niba hari ikintu kigomba gukorwa kandi kiri mu nyungu z’abaturage kandi ukaba ushoboye kugikora, rwose ni icyaha iyo icyo kintu utagikoze!

Umunyamakuru: Ni icyaha kutagikora….?

Duhemberwa kugira ngo dukore akazi, ibintu bishyirwe mu bikorwa kandi mu nyungu za rubanda, niba utabikora; ni ukuvuga ko urimo wiba amafaranga y’abaturage akwishyurira umushahara, niba rero hari ikintu kigomba gukorwa kandi tukaba tuzi uko twabigenza, kuko tuzi ko bikenewe ndetse n’ibyo dutegerejweho, nta kundi byagenda bigomba gukorwa!

Umunyamakuru: Ariko urabizi ko iyo myumvire idafitwe na bose, kuki wowe utandukanye?

Ntabwo ntandukanye n’abandi, iki gihugu kimaze gutera intambwe ishimishije, hari ibintu byinshi byahindutse kandi biterwa no gushyira hamwe kw’Abanyarwanda.

Umunyamakuru: Ariko birashoboka ko ufite imyifatire itandukanye (Special Character)?

Yego birashoboka, ibyo singiye kubihakana [araseka…]

Umunyamakuru: Ariko ufite no kwihagararaho (Confidence)?

Kwihagararaho?! …Urumva; iyo ukora ibintu kandi uziko ari byo bikenewe, ntibivuga ko udakora amakosa, rimwe na rimwe kuko nta muntu udakora amakosa, akenshi kugira imitekerereze mizima kandi ugahora witeguye guhinduka, ukeneye koroha ndetse no guca bugufi wemera ko utujuje byose ijana ku ijana (100%) ariko iyo uzi neza ibyo ukora, utera intambwe ugakomeza.

Buriya ikiguzi ni kinini cyane ku mwanya dufata tujya impaka; niba uzi aho ugana, wowe komeza; nugera ahantu ubona ko ari ngombwa guhindura; Hindura!

Umunyamakuru: Ndisegura, ntabwo ndi inzobere mu bijyanye n’ubuzima ariko iyo ndebesheje amaso asanzwe, nibwira ko igice cy’ubuzima (health Sector) gifite ibibazo bikomeye; ubwo wowe urasinzira?

Kubera iki se? Mu minota itanu ishize umbwiye ko mfite itoto (I look fresh), rwose turaryama kandi ukwiye kumenya ko ntakora njyenyine, dukora nka team (ikipe). Mu guhungana n’ibibazo biri mu gice kirebana n’ubuvuzi, mu gushyira mu bikorwa ibyemezo byafashwe, mu gutanga serivisi; byose ni uruhererekane kandi muri urwo ruhererekane harimo amatsinda kandi abantu bakorera hamwe.

Umunyamakuru: Ndabyumva iyo ishobora kuba ari imvugo ya politiki…

“Oya ntabwo ari imvugo ya politiki, reka nkubwire hano turi abaministri babiri n’Umunyamabanga Uhoraho; dufatira hamwe ibyemezo, hari ubufatanye. Dufite urwego rwa kabiri; hari umuyobozi w’ibitaro n’abaganga bose ndetse n’abafasha b’abaganga, dufata icyemezo na bo bagashyira mu bikorwa mu buryo bwihuse. Birumvikana ibintu byose si shyashya ariko twishimiye ko byibuze turi kuri 40% y’aho dushaka kugera, turacyafite urugendo rurerure; ngibyo ibibazo dufite; turacyafite ingorane y’imyumvire (mindset); dukeneye kumva neza impamvu dusabwa ibintu binoze, dukwiye gushyira ubwo bushake mu bantu bose batanga serivisi bakumva ko gutanga serivisi ari uburenganzira bw’abakiriya. Ibyo rero nta muntu wabikora wenyine; u Rwanda ni Igihugu kinini n’ubwo gifite ubuso buto, u Rwanda ni Igihugu kimwe muri Afurika gifite abafasha b’abaganga (nurses) bita ku barwayi muri buri murenge, guhuza ibi bikorwa byose bisaba gukorera hamwe, By the way; ntabwo nshoboye politike ahubwo nshoboye gushyira ibintu mu bikorwa…”

Umunyamakuru: Iyo mbonye uburyo ufata ibyemezo; ubona ufite imyifatire y’abantu barakara vuba ariko bazi no gufata ibyemezo; ndabeshya?

Njyewe; Urabeshya! Wari wambona njyewe ndakaye? Ushobora kuba ukarishye kandi utuje, wari wambona se meze gutyo?

Umunyamakuru: bishobora kugaragazwa n’ibyemezo ufata gusa ndabona ubu utuje, ugaragara nk’umugwaneza…

Oya, ntabwo ndi umugwaneza, ntabwo mpemberwa kuba umugwaneza, ngomba kubaha, ngashishoza kandi ngakora ikintu ntakinyuze hirya (straight to the point), kandi reka nkubwire; ibyemezo dufata byose biba bifite aho bishingiye.

Umunyamakuru: Ariko n’uburyo uvuga wemye bigaragaza uwo uri we, byaba biterwa n’uburyo wakuze n’aho wigiye?

Oya, nigiye amashuri yisumbuye mu Bubiligi n’amashuri y’ubuvuzi nyigira mu Bubiligi, natuye mu Bufaransa, Impamyabushobozi y’Ikirenga (PhD) nyigira mu Rwanda; ntekereza ko ubumenyi buri hose ahubwo ntekereza ko biterwa no kuba uzi icyo ushaka bidaterwa n’aho ukomoka. Hari abantu benshi batigeze barenga i Kigali ariko bazi neza icyo bashaka mu buzima kandi basobanutse…

Umunyamakuru: Wize ubuvuzi none uri mu mwanya wa politiki, ufata ibyemezo; urumva uri aho ugomba kuba?

Igihe nemejwe ko ninjira mu buyobozi bw’ibikorwa, nari umuyobozi w’umushinga wita ku buvuzi, ni wo munsi nasobanuriwe ko nshobora no gukora byinshi bijyanye n’ubuvuzi bw’abana bato, icyo ni cyo gihe twazanaga imiti ndetse tunigisha abantu bo gufasha abana icyo gihe bapfaga; abenshi bishwe n’agakoko gatera SIDA, uko ni ko numvise ko bikwiriye kuko nkunda akazi kanjye.

Umunyamakuru: Kuba minisitiri hano ntabwo byoroshye; ni gute wabaye Minisitiri?

Mu by’ukuri ntabwo nigeze mbisaba kuko sinakuze kugira ngo nzabe minisitiri, ngira ngo ni uruhurirane rw’igihe ndetse n’ubumenyi bwari bukenewe kandi nari mu bantu bari bafite ubwo bumenyi.

Umunyamakuru: Maze kuganira n’abandi ba minisitiri bagenzi bawe ariko nta n’umwe uransobanurira neza icyo bashingiyeho bamugira minisitiri ariko wowe urambwira ko byari bijyanye n’Igihe ndetse n’ubumenyi wari ufite…

“Njyewe nta mu minisitiri nzi wapfuye kugirwa minisitiri gutyo; bose bagizwe bo bishingiye ku bumenyi bwabo n’ubushobozi bwo gutanga umusaruro, kubera ko nshobora kuba mfite ubumenyi ariko ntafite ubushobozi bwo gukora ibintu neza cyangwa se ari ikinyuranyo… Icyo mvuga njyewe ni uko uyu munsi ndi hano kubera ubumenyi mfite ariko si ejo cyangwa se ejo bundi.”
Dr. Agnes Binagwaho akora Sports cyane cyane gutwara igare (gymtonic). Nta byo kurya yanga ariko yita ku mirire ye kandi akarya bikeya cyane. Afite umwihariko wo kurya imboga, salade irimo vinegre ndetse agakunda na cheese.

Anywa kandi inzoga “murugero” kandi agakunda cyane “red wine” iyo amaze gufungura.

Umunyamakuru amubajije niba agira idini asengeramo, Dr. Agnes Binagwaho yasubije agira ati, “mfite uburyo bwihariye mbanyemo n’Imana, Imana yampaye umugisha w’ubuzima bwiza ndetse n‘umuryango mwiza… gusa ntukitiranye imyifatire y’umuntu agaragaza inyuma kuko itandukanye n’ibiri imbere…”

Umunyamakuru: Uyu munsi ndatunguwe, abantu bakuzi nka Minisitiri utagira urwenya, uhora ukakaye ariko ndabona umwenyura…

“Oh Mana yanjye, nta na rimwe ntatera urwenya n’iyo ndi mu nama, uzabaze abantu dukorana.”

Umunyamakuru: U Rwanda rufite umubare muto w’inzobere z’abaganga, hari n’ibindi bibazo; ni iki wumva ushaka gukora kizatuma umuntu uzagusimbura avuga ko uwamubanjirije Dr. Binagwaho yakoze?

Mbere na mbere ndifuza ko uzankurikira azavuga ko yari gahunda ya Guverinoma y’u Rwanda, reka nkomereze aho abandi bari bagejeje; mbere yanjye hari abaminisitiri bambanjirije kandi na nyuma yanjye hazaba hari abandi. Ariko twongereye ubumenyi n’ubushobozi bw’abakozi, twumvikanye n’ibihugu bitandukanye kugira ngo mu myaka irindwi tugire inzobere 500 ndetse n’abita kubarwayi (nurses) 5000 bafite icyiciro cya mbere cya kaminuza ndetse n’abandi…

Minisitiri Dr. Agnes Binagwaho ni Umunyamuryango wa RPF-Inkotanyi kandi yemera cyane Perezida Paul Kagame ku buryo amufataho icyitegererezo.

BinagwaUmunyamakuru: Numvise ko ubu wiga Ikinyarwanda, ubu Ukigejeje hehe?

Yego naratangiye kandi buhoro buhoro birimo biraza

Umunyamakuru: Ngaho mbwiraho amagambo make mu Kinyarwanda, makeya rwose…”

“A few words? Urasha-k-ka iki? Wabo-enye ibyo ushaka. Bye! Igitwenge…araseka

Source: http://www.izuba-rirashe.com

About Rwanda news

I hate injustice!

Posted on 20/02/2015, in Uncategorized. Bookmark the permalink. 1 Comment.

  1. Fred, you are one of the few smart journalists in this country. Wasoma

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: