Minisitiri muto muri Guverinoma y’u #Rwanda: yaciye he kugira ngo agere aho ari?

Evode Imena, Umunyamabanga wa Leta ushinzwe Ubucukuzi bw’amabuye y’agaciro muri Ministeri y’Ubutaka, amashyamba n’umutungo kamere

Evode Imena, Umunyamabanga wa Leta ushinzwe Ubucukuzi bw’amabuye y’agaciro muri Ministeri y’Ubutaka, amashyamba n’umutungo kamere

Evode Imena yinjiye muri Guverinoma y’u Rwanda afite imyaka 28 y’amavuko. Ubu afite imyaka 29 y’amavuko (Yavutse tariki 10/10/1985).

Ni Umunyamabanga wa Leta ushinzwe Ubucukuzi bw’amabuye y’agaciro muri Ministeri y’Ubutaka, amashyamba n’umutungo kamere.

Nubwo ari muto mu myaka ariko ni Umuhanga kandi afite ubwenge n’ubwitonzi bigaragarira mu biganiro bye.

Ubwo yaganiraga n’Umunyamakuru w’Izuba Rirashe, Evode Imena yagaragaje kwitwararika mu mvugo; cyane cyane ubwo yabazwaga uko yinjiye muri Guverinoma y’u Rwanda ndetse n’aho yasabwaga kuvuga ibyo yifuza kugeraho n’ibyo amaze kugeraho.

Yirinze kuvuga ibyo yakoze mu buhanga bwe cyangwa se aho ashobora kuganisha u Rwanda mu bijyanye n’Umutungo kamere mu nshingano afite.

Imena Evode ni nde?

Yavukiye i Burundi ahitwa Shatanya – Gitega; avuka tariki ya 10 Ukwakira 1985.

Yabyawe na Evariste Ntawuyirusha na Donatilla Yampurije.

Ni Umugabo wubatse, yashakanye na Janviere Imena bafitanye umwana umwe.

Ni Umugabo uganira kandi n’ubwo inshingano ziyongereye ntabwo abura umwanya wo guhura n’inshuti zisanzwe.

Yigiye amashuri yisumbuye mu Byimana (Ruhango) na Kigeme (Gikongoro), naho Kaminuza ayigira mu gihugu cya Maroc.

Afite Ubumenyi buhagije mu bijyanye n’ubucukuzi bw’amabuye y’agaciro n’undi mutungo kamere.

Yigiye muri Kaminuza ya Chouaib Doukkali iri mu mujyi wa El Jadida ndetse afite impamyabumenyi y’icyiciro cya kabiri cya kaminuza nayo yavanye muri Maroc muri Metalogenie.

Akirangiza kwiga amashuri ye; yahise abona akazi muri Ministeri y’umutungo kamere mu kigo cya Mine na Geologie (akazi yatangiye mu mwaka 2009).

Yavuye muri icyo kigo agirwa Umunyamabanga wa Leta ushinzwe Ubucukuzi bw’amabuye y’agaciro, Umwanya yahawe na Perezida Paul Kagame muri Gashyantare 2013 kugeza ubu.

Dore bimwe mu bisubizo yahaye Ikinyamakuru Izuba Rirashe…

Umunyamakuru: Kuva watangira inshingano nshya mu myaka ibiri ishize, wasanze bimeze gute?

Imena Evode”Biragoye gato gusubiza, mbere na mbere nakoraga muri iyi minisiteri nkora mu kigo cy’umutungo kamere, nyuma ni bwo nabaye State minister(Umunyamabanga wa Leta), urumva rero ibibazo birimo byinshi nari mbizi, ikigamijwe kugerwaho byaba ku rwego rw’ikigo, yaba department ya Geologie na Mine nari mbizi kubera igihe nari maze nkoramo, hasaba gusa kuvuga ngo mpinduriwe umwanya, ngiye mu mwanya w’abafata imyanzuro ituma za ntego zigerwaho, ni cyo rero cyahindutse; bisaba rero guhindura uko wakoraga kuko wari ufite umuyobozi mukuru cyangwa Umunyamabanga uhoraho ukuri hejuru ukubwira ibyo ukora, none ubu byarahindutse ni njyewe uvuga ngo mukore ibi, ni icyo cyahindutse. Izo mpinduka zifata iminsi ariko amahirwe iki gihugu gifite uburyo (System) gikoreramo, iteka haba hari abagukuriye, abo musangiye imirimo, abakurusha experience abo bose rero ni bo bakwereka uko bikorwa…”

Umunyamakuru: Ubu rero uri umunyapolitiki, ubu buzima bwo muri politiki wigeze utekereza ko hari igihe uzaba uburimo?

“Eeeeh…navuga gute se? Si rwose, naba mbeshye gusa kuva na kera ndi ku masomo, nakundaga gukorana n’abandi no gusangira na bo ibitekerezo. N’indi mirimo nakoze; nakoranaga n’abandi ariko gushingwa imirimo ku rwego rukuru rw’Igihugu byo ni ibindi kandi bitandukanye ariko nk’uko nabivuze iyo ufite abagukuriye kandi babimazemo igihe; urabegera bakagufasha… ariko sinigeze nicara ngo mvuge ngo nzaba State minister (Umunyabanga wa Leta), ibyo byaba ari ukubeshya.”

Umunyamakuru: Iyi Protocol, guhindura imyifatire urabishobora?

“Protocole byo ugomba kuyubaha kubera umurimo uhagarariye, waba ufite inshingano runaka muri Ministeri ngo wemererwe kuba ari wowe udurumbanya ibintu, akaba ari wowe usakuza, ugatera akaduruvayo ahubwo hari benshi bagutegerejeho urugero…Protocole ni ubwo buryo nyibonamo, niba hari aho wicara, ibyo uvuga n’igihe ubivugira, niba na mbere wakundaga kuganira; ubwo uramenya ko byahindutse kubera kubaha wa murimo ariko na none ntugomba guhinduka kuko iyo uhindutse byose biratakara kandi ndakeka abantu baba bagutegerejemo kureba ko uri wa wundi wa mbere. Komeza ube uwo uri we, abo akunda ukomeze ubakunde kandi urusheho kubana na bo ariko muri ya Discipline ijyanye n’umurimo urimo.”

Umunyamakuru: Ubu inshuti zawe mwasangiraga, uracyazibonera umwanya?

“yego turasangira… si umunsi ku munsi nk’uko twahuraga muri weekend, ku mugoroba ariko ndagerageza nkabona umwanya kandi ndawubona, Bon… hari abo tudapfa kubonana bari kure ariko na bo iyo babonye akanya bakansura turabonana…”

Umunyamakuru: Tubwire rero, Umunsi wa mbere wicaye mu Nama y’Abaminisitiri wumvaga umeze ute?

“natangirira igihe narahiraga, wumva [ibintu] bihindutse ukavuga uti njyewe wa muntu usanzwe ngiye kujya kurahira imbere y’Inteko, imbere y’abayobozi bakuru b’Igihugu cyane cyane harimo na Perezida, yeee hari icyo bigukoraho ku mutima ukumva urahindutse, ubuzima bwawe burahindutse. Ni ho numvise hari ikintu ndavuga nti; huuum bya bintu burya ni ukuri?!! Hari ikintu gihinduka kandi muri wowe ntibirangire ukumva hari akantu kagukomanzemo…”
 
Imena EvodeUmunyamakuru: Yego birumvikana, abari muri Guverinoma ni abantu bacye, baba batoranijwe, ubu waratoranyijwe?

“hahahaha nawe ejo uzatoranywa…ni ibintu biza utazi uko… guseka…”

Umunyamakuru: Heheheh…Oya mbwira uko byagenze kugira ngo Evode bamutoranye?

“oya…ntabwo, si ukukubeshya; uretse nanjye n’abandi benshi bayirimo (Guverinoma) numva icyo kibazo batagisubiza, ntabwo wabisobanura, sinzi impamvu kuko si njye witoranya nta na candidature utanga…wabibaza His Excellency The President (Nyakubahwa Perezida) ni we ubikora, ni we udushyiraho?
 
Umunyamakuru: None se yakumenye gute?

“Nabimenya gute? ( Igitwenge…) ntabwo mbizi ariko ikigaragara ni uko hari uburyo Igihugu gikora kandi kiyobowe …ni muri izo nzira, ni ho bica. Ni systeme y’Igihugu ariko sinzi impamvu, nta gisobanuro mbifitiye. Ariko [iyo bibaye] uravuga uti ndashima Icyizere ngiriwe gikomeye, inshingano zihambaye mpawe, ndasaba Imana n’abantu ngo bamfashe sinzateguhe uwantoranije, cyane cyane ariko bariya bose unyura imbere ukarahira… ”

Umunyamakuru: Hari ubwo bagenzi bawe (abaminisitiri) bavuga bati uyu ni Umujeni, Imyaka yawe bakayihuza n’akazi, ahari mu buryo bw’urwenya?

“Icyiza ntabwo ndi njyenyine, icya kabiri; tuba turimo (muri Guverinoma) kubera akazi ariko muri ako kazi mugenda mumenyerana, mugirana ubucuti ariko nyine ibyo ntibibura ko bavuga ngo; Evode, Umujeni kandi ibyo ndabikunda kuko kuba ndi Umujeni birandyoheye kuko n’abanduta hari igihe babayeho abajeni. Ariko mu kazi ibyo ntabwo njya mbibona.”

Evode Imena avuga ko mu mashuri yisumbuye yize Bio-Chimie ariko kandi yumvaga adashobora kuba umuganga cyangwa ngo akore ibisa na byo, kuko atinya amaraso, akanga n’ibinini. Ibyo byatumye ajya kwigira muri Maroc ashyirwa mu ishuri ryigisha ibijyanye n’ubumenyi mu by’Umutungo kamere.

Abantu benshi b’urungano ngo baramusekaga bamubaza icyo azabikoresha ngo kuko n’ababyize kera babuze akazi bamubwira ko mu Rwanda nta mabuye y’agaciro ahari.

Uyu munsi arishimira ko u Rwanda rufite amabuye y’agaciro kandi yinjiriza Igihugu amafaranga menshi.

Umwaka wa 2013 – u Rwanda rwinjije miliyoni 226 $ (amadolari ya Amerika)
 
Umwaka wa 2014 – hinjiye miliyoni 210 $

Isoko ry’u Rwanda mu bijyanye n’amabuye y’agaciro riri cyane mu bihugu bya Aziya birimo u Bushinwa, Vietnam, Malaysia, Indonesia, Vietnam na Singapore.

Imena afite inzozi zo kubona ahari Mine mu Gihugu hashobora gutunganyirizwa amabuye y’agaciro aho kubikorera i Kigali naho ; i Kigali hakaboneka uruganda rushongesha ayo mabuye ubusanzwe ubu ashongesherezwa mu bihugu bya Aziya ari naho agurishwa.

Byose yerekanaga ko adakora wenyine kandi akavuga ko nta murongo yihariye afite ahubwo ashyira mu bikorwa ibikubiye mu Cyerekezo 2020, Gahunda y’imbaturabukungu ya kabiri(EDPRS 2) ndetse na gahunda ya Perezida Paul Kagame muri manda ya Kabiri (2010-2017).

Ubuzima busanzwe

Evode Imena akora Siporo cyane cyane kwiruka buri gitondo no koga (Swimming).

Arya ibyo kurya by’ubwoko bwose ariko agakunda ‘Sea food’.

Anywa inzoga cyane cyane ka Whisky ariko bigaterwa n’akazi kuko ngo atakibona akanya ko kunywa.

Avuga ko ari Umukirisitu wo mu idini ry’abanyagatulika ariko gusenga si ibintu bye, ajya mu rusengero yatumiwe cyangwa hari impamvu.

Source: http://www.izuba-rirashe.com

About Rwanda news

I hate injustice!

Posted on 30/01/2015, in Interviews. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: